កូរ៉េខាងជើង៖ អ្នកនាង Kim Yo Jong ជាប្អូនស្រីរបស់មេដឹកនាំកូរ៉េខាងជើង Kim Jong Un បាននិយាយកាលពីថ្ងៃចន្ទ ទី០១ ខែសីហាម្សិលមិញនេះថា ប្រសិនបើកូរ៉េខាងត្បូងមានបំណងចង់ចូលរួមនៅក្នុងសមយុទ្ធយោធារួមគ្នាជាមួយសហរដ្ឋអាមេរិកនាពេលខាងមុខ កត្តានេះនឹងជះឥទ្ធិពលអាក្រក់ទៅដល់ការកសាងទំនាក់ទំនងឡើងវិញរវាងបងប្អូនកូរ៉េទាំងពីរ។ នេះបើតាមការរាយការណ៍របស់ភ្នាក់ងារព័ត៌មានរដ្ឋរបស់កូរ៉េខាងជើង KCNA។

ការលើកឡើងរបស់ស្រ្តីដ៏មានឥទ្ធិពលរបស់កូរ៉េខាងជើងរូបនេះបានកើតមាន ក្រោយពីមេដឹកនាំនៃបណ្តាប្រទេសទាំងពីរគឺកូរ៉េខាងជើង និងខាងត្បូងកំពុងពិភាក្សាគ្នា និងពិចារណាអំពីការស្តារឡើងវិញនូវទំនាក់ទំនងភាគីទាំងពីរ ប៉ុន្តែក្នុងកំឡុងពេលជាមួយគ្នានេះកូរ៉េខាងត្បូងហាក់មិនលែងដៃពីទំនាក់ទំនងជាមួយរដ្ឋាភិបាលសហរដ្ឋអាមេរិកដែរ ពោលគឺទីក្រុងសេអ៊ូល និងទីក្រុងវ៉ាស៊ីនតោនកំពុងត្រៀមលទ្ធភាពធ្វើសមយុទ្ធយោធារួមគ្នាក្នុងខែសីហានេះផ្ទាល់។

អ្នកនាង Kim ហាក់ទម្លាក់បន្ទុកទៅលើកូរ៉េខាងត្បូងបន្តិច ដោយអ្នកនាងបាននិយាយថា រដ្ឋាភិបាល ព្រមទាំងកងទ័ពរបស់យើង (កូរ៉េខាងជើង) កំពុងសម្លឹងមិនដាក់ភ្នែកទៅលើជំហានបន្តរបស់ពួកគេ (កូរ៉េខាងត្បូង) ថាតើគេនឹងជ្រើសរើសផ្លូវមួយណា រវាងការហាត់សមយុទ្ធយោធា ឬការសម្រេចចិត្តដ៏ធំមួយ! ស្រេចតែលើពួកគេប៉ុណ្ណោះ។ ចំណុចនេះអ្នកនាង Kim ទំនងចង់សំដៅទៅលើការជ្រើសរើសសមយុទ្ធយោធាជាមួយអាមេរិក ឬការស្តារភាពជាបងប្អូនកូរ៉េឡើងវិញ។

គួរបញ្ជាក់ថា រដ្ឋាភិបាលប្រទេសទាំងពីរ ទើបបានបង្ហាញសញ្ញាណល្អនៃការស្តារទំនាក់ទំនងការទូតឡើងវិញ ដោយបានអនុញ្ញាតឱ្យមានការភ្ជាប់ជាថ្មីនូវប្រព័ន្ធទូរសព្ទ Hotline ក្រោយការកាត់ផ្តាច់តាំងពីខែមិថុនា ឆ្នាំ២០២០កន្លងមក៕